Najeriya: Mayakan Boko Haram Sun Mamaye Wasu Yankunan Jihar Neja
Gwamnan jihar Abubakar Bello ya bayyana cewa Boko Haram ta mamaye kananan hukumomin Kaure da Shiroro dake jihar, baya ga haka kuma sun kwace wa magidanta matayensu sun rabawa kansu, sannan sun kafa tuta a tsakiyar Garuruwan.
A rahoton da jaridar Premium Times ta bayar, ta bayyana cewa hakan ya zo ne a cikin sanarwar da babban mai bai wa gwamna Bello shawara kan watsa labarai Mu’awuya Muye ya fitar, inda ya ce gwamnan ya bayyana cewa: “Boko Haram sun kwace yankin sun kuma kafa tutarsu, ina tabbatar da hakan a yanzu”
Gwamna Bello ya ce, ya dade ya na kwankwasa kofar fadar gwamnatin tarayya a Abuja domin ya kai kukansa kan kwararowar Boko Haram jiharsa domin a gaggauta daukar mataki a kan hakan, amma ba a yi komai ba, to yanzu abin tsoron shi ne ita kanta Abuja ba za ta tsira ba.
Domin a cewar gwamnan, Sambisa na da nisa daga Abuja, amma Kaure kusa ta ke da Abuja, saboda haka a halin yanzu babu wanda zai kubutar da Abuja daga kwararowarsu.
Gwamnan na jihar Neja ya ce shi a halin yanzu ya gama sauraren wani kan batun tsaron jiharsa, zai dauki matakin da yake ganin ya dace ne kawai kai tsaye.
